Azken asteari etekina ateratzen...

Iritsi da lauhilabete honetako azken astea!

Beraz, gaur IKT ikasgaiko azken saio teorikoa izan dugu. Astero legez aurkezpenak egin behar izan ditugu, gaur hiru egin ditugu eta horietako bat gurea izan da.

Lehenengo taldekoek PLE eta MOOC (Online ikastaroa)-ari buruz hitz egin dute. Aurretik ere kontzeptu hauek azaldu ditudanez, ez naiz askorik luzatuko. MOOCari buruz esan beharrekoa da, eduki eta espazio mugagabea duela eta erabiltzeko erraza dela. Gainera, Internetetik materiala hartzea nahiko erraza da, oso eskuragarri baitugu.

Ondorengo aurkezpena besteetatik oso desberdina izan da, Power Pointa erabiliz ¿Quién quiere ser millonario? telesaila imitatu baitute. Horren bidez eta Hot potatoes, aurreko astean ikasitako programaren bidez, ariketa eta galdera ezberdinak prestatu dituzte, entzuleei parte hartzera gonbidatuz. Era honetara, eta jendeak emandako erantzunak kontuan izanez ondoren aipatuko ditudan zenbait gai azaldu dituzte.

Hasteko, gizarte aldaketak hezkuntzan gutxi isladatzen direla azaldu dute, eta ez litzatekeela horrela izan beharko, hezkuntzan horiek eragina izan behar dute. Bestetik, gaur egun kultura multimodala daukagula azadu dute, formatu eta hizkuntza ezberdinak, teknologia ezberdinak eta euskarri ezberdinak erabiltzen ditugulako. Lau alfabetatze berriri buruz ere hitz egin digute: audiobisuala, digitala, informazionala eta alfabetatze anitza.

Horrez gain, eskoletan IKTak erabiltzearen helburua erabiltzaile kontziente eta kritikoak heztea dela azaldu dute. Gainera, horiek ikasle bakoitzari bere errimtora lan egiteko aukera ematen diotela ere komentatu dute; baita ikasleek eskolan nahiz etxean erabili ahal dituztela eta horrek abantaila asko dituela. Modu honetara, aurkezpena erakargarriagoa izatea egin dute eta baita jendeak arreta gehiago jartzea ere. Ideia ona izan da eskolan irakasle bezala erabiltzeko ere.

Irakasgai honetako azken aurkezpena gurea izan da. Erakargarriago izateko, ikaskideei programa berriak erakusteko eta aurkezpenak egiteko erabiltzen ditugun ohiko programetatik ezberdina den bat erabiltzeko asmoz, Emaze erabili dugu. Hemen daukazue gure aurkezpena:


IKTak gaur egungo eskoletan izan da gure gaia eta Area. M. (2009). La competencia digital e informacional. Santander: UIMP-tik atera dugu informazioa. IKTak eta berrikuntza, hezkuntza ereduak eta dekalogoari buruz hitz egin dugu eta amaieran hausnarketa bat egin dugu teknologia eta testu inprimatuei buruz gure iritzia emanez.

Azaldu dugun guztitik niretzat ideia nabarmenenak hauek izan dira:

• Eskoletan garrantzitsuena pedagogia dela eta ez teknologia, hau da, helburua beti izango da haurrak heztea.
• Eskoletan IKTak erabiltzerakoan lana planifikatuta izatea beharrezkoa dela, hau da, hauek erabiltzen ari garen guztietan askatasunez jarduten uzten badiegu kaosa sortuko dela ikasgelan.

Aurkezpenarekin bukatzeko, talde bezala egin dugun teknologia berriei eta testu inprimatuei buruzko hausnarketan bi hauek erabiltzea oso aberasgarria dela azaldu dugu. Garrantzitsua da teknologia berriak erabili arren, haurrek paper inprimatuan lan egiten  jakitea. 

Beraz, gaurko azalpenekin IKT-ko klase magistralak bukatu ditugu.

Aste honetako saio praktikoak oso dibertigarriak iruditu zaizkit. Hasteko, mugikorrei buruz aritu gara hizketan, guk mugikorren inguruan genekizkien gauza bitxiak ikaskideei irakatsi dizkiegu. Clean master (mugikorreko memoriatik dena guztiz ezabatzen duen programa), Metro Bilbao (metroaren inguruko informazioa eskuratzekoa)... hainbat eta hainbat aplikazioa daudela ohartu gara.

Bide beretik, irakasleak QR (Quick Response) -ri buruz hitz egin digu. Kode baten bezalakoa da, erakusketetan, arropetan eta beste hainbat lekutan aurki dezakeguna. Mugikorrean horrekin lotutako aplikazioa badaukazu, mobila horren aurrean jarri eta irakurri egiten du; horrela, arropa, museo, bolg edo kodea kokatuta dagoen tokia eta inguruari buruzko informazioa ematen dizu, web orri horretara eramanez. Hori horrela izanik eta probatu ahal izateko, Unitagen sartu eta gure blogaren QRa egin dugu. Ikus dezakezuenez, blogaren azpaildean dago eta mugikorra horren aurrean jarriz gero nire blogera eramaten zaitu QRak. Telefono mobilaren bidez QRa irakurri ahal izateko Lector QR aplikazioa jaitsi behar da.

Oso interesgarria izan da horren berri izatea, gure inguruan hainbat lekutan ikus daitezkeelako halakoak. Horrenbestez, nire ustez, argi dago gure bizitza pertsonalerako dela eta ez haurrekin erabiltzeko, agian gure ikasle askok mugikorrak ere ez dituztelako izango.

http://www.banrepcultural.org/sites/default/files/field_artista/ola-invernal.jpg

Ondoren, infografiei buruz hizketan aritu gara, Lehen Hezkuntzako bosgarren eta seigarren mailan lantzeko oso praktikoa baita. Irakasleak azaldu digu informazio ugari, askotan grafiko bidez, ematen duen kartel bat dela egunkarietan adibidez asko erabiltzen dena. 
Infografiak egiteko programarik erabiliena Easely da, erabiltzeko erraza baita eta hamar hamabi urteko haurrek erabili dezaketelako. Hori probatzeko, geuk ere gure infografia sortu dugu: Janari osasuntsua

Blogaren egilearena

Wordleri buruz ere hitz egin dugu. Hitzez osatutako irudi bat da; horrenbestez, definizio teoriko bat eman ordez, hitzak ematen dizkigu guk definizioa eraiki dezkegun. Haurrentzat oso entretenigarria delakoan nago. Horretarako, Tagxedo ere badaukagu, baina honek aukera gehiago ematen dizkigu. Hona hemen azken hau erabiliz sortutako infografiak: http://www.tagxedo.com/gallery.html

Zooburst ere aipatzekoa da, 3D erara lan egiten baitu. Haurrentzat era honetara lan egitea oso erakargarria izaten da eta asko laguntzen die gauza berriak ulertzen. Gainera, halakoekin arreta gehiago jartzen dute.

ColAR programa ere ezin dezakegu aipatu gabe utzi, azkenaldian gero eta gehiago erabiltzen baita haurren artean. Honetan irudi batzuk inprimatu eta haurrei horiek margotzeko aukera ematen zaie. Margotzen bukatu dutenean, argazkia ateratzen zaio egindakoari eta programak 3D erara jartzen du beraiek sortutako marrazkia. Umeentzako haiek margotutako irudia 3D erara ikusi ahal izatea sinesgarria da eta asko disfrutatzen dute. Niri ere izugarri gustatu zait eta harrigarria iruditu zait!

Azken saio praktikorako irakasleak oso ideia polita izan duela uste dut. Modulu lanerako egin behar izan ditugun bideoak aurkeztu dituzte bere gidaritzan zeuden ikasleek. Horiek ikustea eta galderak egitea oso interesgarria eta aberasgarria izan da teknika berriak barneratzeko, haien lana baloratzeko eta hobetu beharko litzatekeenaz hausnartzeko.

Gainera, gure bideoa erakusteko eskatu diogu irakasleari. Badakigu zenbait akats badituela, adibidez zati batzuetan soinua ez dela ondo entzuten, baina ez gara profesionalak! 

Hala ere, lan eta esfortzu handia egin dugunez, gure kideei erakutsi nahi izan diegu, oso harro baikaude lortutakoaz. Kontuan izanda bideo bat grabatzen genuen lehen aldia zela eta geure kabuz, profesionalen laguntzarik gabe egin dugula ezin hobeto dagoelakoan gaude! Gure lanak merezi izan du eta pozik gaude!
Patxi Bizkaiko ondareak ezagutzen izenburua jarri diogu lanari eta hementxe daukazue ikusi nahi baduzue. 

Beraz, hauxe izan da azken astea, asko ikasi dugu eta pozik gaude arlo honetan pixkanaka pixkanaka aurrera egin  dugulako!

Beste bat arte!

Etorkizunari begirada: Interesgarria irakasle izango garenontzat

Astero legez, saio magistralarekin hasi dugu IKT irakasgaia. Gaurko bi taldeek Interneti buruz hitz egin digute eta hainbat gauzei buruz ohartzeko aukera izan dut.

Hasteko, lehenengo taldeak Interneten arriskuez hitz egin du. Egia da honi esker informazio asko daukagula eskura eta komunikazioa eta bizitzako beste hainbat alderdi errazten dizkigula. Hala ere, hainbat arrisku ditu eta askotan ez gara horietaz ohartzen. Arrisku handiena gaztetxoen artean sumatzen dut.

Internetek hainbat kalte eragin ditzake gizartean (haur pornografia, arrazakeria, indarkeria...) eta gezurreko informazioa ere eman diezaguke gu ohartzen ez garen arren (kasurako ezezagun batekin hitz egiterakoan).

http://www.blogtrw.com/wp-content/uploads/redes-sociales1.jpg

Ohartu beharreko beste faktore bat da Internetek ez duela informazio pribatua babesten, denon eskura dago bertan jarritako informazioa eta enpresek bertako datu guztiak erabili ditzakete; adibidez, sare sozialetan jartzen dugun informazioa.

Gizartean faktore honek eragindako aldaketak direla eta, eskolek zeregin garrantzitsua daukate arlo honetan, ikaslearen ongizatea bermatu behar baitute eta arriskuak kontrolatzen jakin behar baitute. Beraz, ikasleei sarea arduraz erabiltzen irakasteko material didaktikoa sortu da. Safe proiektua. Material hau hizkuntza ezberdinetan dago eta arriskuak gutxitzeko eta monitorizatzeko programak erabiltzea du helburu. Gainera, IEP (Internet segurtasunez erabiltzeko Eskola Politika) prestatu dute eskolan arriskurik gabe sarean ibili ahal izateko.

Egia da, Internetez ematen den hezkuntza beharrezkoa dela, berau bizitza modernoaren funtsezko zatia baita guretzat. Gainera, maila igotzeko, arrakasta sustatzeko, informazioa kudeatzeko... aukera zabala eskaintzen digu tresna honek. Hala ere, irakasleek, nire ustez, hezkuntza mota honetan, ikasleak gidatu beharko lituzkete Interneteko sarbidea haiek erabiltzeko diseinatuta egon dadin eta adinaren araberako iragazteko sistema izan dezan arriskuetatik babesteko; horrez gain, erabilera ere arautu beharko lukete.

Bigarren aurkezpenak, Segurtasuna Interneten izenburua izan du. Hasteko, sareko edukiak ebaluatzen ikasteko estrategia batzuk azaldu dizkigute, askotan ez baitugu kontuan hartzen. Adibidez, Copyrighta errespetatzearena, beraz, informazio iturriak aipatzen irakastea ezinbestekoa da. Ikastetxeak ikasleek legedia kontuan hartzen dutela ziurtatzea ezinbestekoa da.

Aipatutakoaz gain, eskolan web orriak erabiltzen dituztenean informazio pertsonalik ez jartzeko eskatuko zaie haurrei; argazkirik ez jartzeko gurasoen baimenik ez baldin badute, edonork ikus ditzakeelako. Horrekin ciberbullyinga bezalako arazoak ekidingo dira.

Ondorioz, Lehen Hezkuntzan haurrekin Interneta erabiliz gero eta dena ondo kontrolatuta izateko, non sartu eta zer egin behar duten esatea beharrezko ikusten dut, guztion lana baita txikiak babestea. Horretarako, neurriak hartu behar dira eta heziketa nahiz prebentzioa izango dira garrantzitsuenak sarean segurtasunez ibili ahal izateko.

Saio praktikoetan, beste hainbat gauza berri ikasi ditugu. Saioaren hasieran, erretiroa hartuta daukaten emakume talde bat etorri da, berrogei urtez irakaskuntzan lanean ibilitakoak ziren. Pozgarria izan da haien poza eta lanarekiko erakutsi diguten pasioa ikustea, ikasketekin gogoz aurrera jarraitzeko indarra eta motibazioa eman baitidate!

Aste honetako saio praktikoak, irakasle izango garen aldetik, oso baliagarriak iruditu zaizkit, eskura ditugun hainbat baliabide erabili ahal izateko aukera eman baitigute. Hasteko, batez ere, hezkuntzara bideratutako softwareak aztertu ditugu, hezkuntzarako sortuta daudenak eta haurrek eginez ikasteko hainbat ariketa dibertigarri eskaintzen dizkigutenak.

http://apriencia.files.wordpress.com/2011/12/eskola-2-0.jpg

Horien artean, Jclic aztertu dugu lehenik. Egia da erabiltzeko Interneta beharrezkoa dela, baina hainbat irakasgai, adin eta gai ezberdinei buruzko ariketak daude, jolasen bidez ikasteko. Ziur nago, haurrak gusturago ikasiko dutela era honetan eta errazago egingo zaiela. 
Hona hemen bertako ariketa bat: zonaClic - actividades - Gure hortzeria
Ondoren, Educaplay ere aztertu dugu, helburu berarekin sortua da hau ere. Honetan harpidetu eta ariketak sortzeko aukera izan dugu. Irakasleentzat ariketak sortzeko erabilerraza da eta ikasleentzat, aldiz, motibagarria. Beraz, hezkuntzan onurak ekarriko dizkigu, oso gomendagarria da eskoletan erabiltzeko. Hona hemen nik sortutako ariketa: Adjektiboak

Eskola 2.0k eskaintzen dizkigun baliabideak ere aztertu ditugu, bertan, irakasleek esekitako aktibitate ezberdinak daude denon eskura eta baita Recursosparaprofesores izeneko orrian ere, biak oso interesgarriak haurrekin erabiltzeko! 

Horrez gain, Lehen Hezkuntzan, komikiak zein ipuinak asko erabiltzen direnez, Prixton programa aztertzen ibili gara eta komikiren bat ere sortu dugu. Hona hemen nire adibidea (irudian klik eginez gero, komiki guztia irakurri daiteke):

Egia esan, irakasleek erabiltzeko eta ikasleak dibertitzeko programa interesgarria delakoan nago; baina ez dut uste ikasleek erabiltzeko erraza denik, hainbat faktore hartu behar direlako kontuan: paisaia, pertsonaien keinuak, aurpegia, forma... dena aldatzeko aukera ematen du, beraz, ikasleentzat nahasgarria izan daiteke haiek askatasunez lan egiteko baldin bada. Hala ere, irakaslearen laguntzaz egiten baldin badute eta bikoteka antolatzen badira, Lehen Hezkuntzako hirugarren zikloan erabili ahalko litzateke.

Komikiei ahotsa jarri eta bideoak sortzeko programa bat ere badela ikasi dugu, Xtranormal izenekoa. Haurrekin lan egiteko oso interesgarria izan daiteke, sormena eta irudimena lantzeaz aparte, idatzizko adierazmena eta ortografia lantzeko aukera ere ematen digulako.

Jarraian, ondorengo kontzeptuak ikasi ditugu: PLE (Personal Learning Environment), hau da, norberak duen ingurunea teknologia berrien inguruan, norberaren ikaskuntza gunea; LMS (Learning Management System), ikasteko plataformak, hain zuzen ere, moodle, e gela eta halakoak; eta MOOC (Massive Online Open Course) modu masiboan online egiten diren ikastaroak. Kontzeptu hauek oso erabiliak dira teknologia berrien munduan, beraz menperatzea oso garrantzitsua da.

PLE eta lehen aipatutako bideo moduan egindako komikien adibideak ikusteko honako orri hau erabili dugu:

Honekin lotuta, ikasleen behe mailako gaitasunaz hitz egiten aritu gara, hau da, ikastea, ulertzea eta aplikatzea, normalean guztiok menperatzen duguna; hala ere, goi mailako gaitasunak lortzea ezinbesteko ikusten dut, analizatzea, sortzea eta ebaluatzea, hain zuzen ere.

Aste honetako materia asko gustatu zait, izan ere, irakasle bezala erabili ahal izango ditugun hainbat baliabide eman dizkigu eta oso interesgarriak iruditu zaizkit guztiak. Aste produktiboa izan da oraingoa!!

Ezagutzetan sakonduz, gehiago ikasiz!

Iritsi da bosgarren astea!!!! Pixkanaka pixkanaka bagoaz gero eta ezagutza gehiago eskuratzen!

Astero legez, Saio teorikoan, bi aurkezpen izan ditugu. Talde biek hitz egin dute Horizonte Proiektuaz, baina alderdi ezberdinak azaldu dituzte lan bakoitzean.

Lehenengo taldekoek, hezkuntza arloan teknologia berriek hurrengo urteetan zehar izango duten inpaktua aztertu dute. Horri buruzko hausnarketa bat egiterakoan, esan beharra daukat, agian gaiaren zailtasun mailagatik, nahiko teknikoa iruditu zaidala, hau da, azalpenak ulertzea nahiko zaila egin zait, erabili dituzten kontzeptu asko ez nituelako ezagutzen.

Bigarren taldearen azalpena, aldiz, ulergarriagoa iruditu zait. Talde honetakoek, unibertsitatean teknologia berriek izan dezaketen eragina aztertu dute eta horren barruan zenbait azpigai azaldu dituzte. MOOC (online Ikastaro Ireki Masiboa) zer den azaldu dute; nik ez nuen aurretik ezagutzen, online egiten diren ikastaroak direla esan dute, hau da, ez duzula bertara joan behar, irekiak direla, matrikulatutako ikasleen kopurua mugagabea dela eta materiala erraz eta doan daukagula eskuragarri Interneten bidez. Oso ondo dago hauen berri izatea.

http://tabletarmy.com/wp-content/uploads/2014/07/tabletas1.jpg

Tabletak ere aipatu dituzte eta hauek hezkuntzan ekartzen dituzten abantailen berri izatea interesgarria iruditu zait: gelako giroa hobetzen dute, ikasleak motibatzen ditu, ikasle eta ikasleen arteko elkarrekintza bultzatzen dute, sormena garatzen laguntzen dute, gaien ulermena eta oroimen bisuala hobetzen dute. Honen guztiaren inguruan hausnartzea interesgarria iruditu zait, askotan honelako tresnek ikaslearen arreta galtzea eragiten dutela uste baitugu, baina zorionez, ez da hala.

Ludifikazioa ere aipatu dute, hau da, jokoen dinamika eta teknikak erabiltzea. Nire iritziz, honek ikasleak motibatzen ditu eta haien autonomia eta pertsonalitatea garatzen laguntzen du. Learning Analytics ikasleen ekintzarekin erlazionatuta dauden datuen analisia da, beraz irakasleentzat (ikasleak nola doazen eta zailtasunak non dituzten ikusteko) zein ikasleentzat erabilgarria dela uste dut. Teknologia eramangarriak zeintzuk diren ere azaldu digute, gailu bezala erabiltzen ditugun jantzi edo osagarriak hain zuzen ere; adibidez, Pulseras up (egindako jarduera fisikoa neurtzeko), kamiseta adimentsuak (erritmo kardiakoa, tenperatura eta arnasketa neurtzeko).
Azkenik, hiru dimentsioko inprimatzea bi taldeetan aipatu da, hau da, objektu tridimentsionalak software baten bidez inprimatzen dituen teknologia. Azken hau harrigarria iruditu zait, ez nuke inoiz pentsatuko hiru dimentsiotako objektuak inprimatzeko gai izango garenik, eta bideoan ikusi ahal izan dugunez horrela da.

Bestalde, aste honetako lehenengo saio praktikoan, Webquesta aztertzen aritu gara. Lehen Hezkuntzako ikasleekin erabiltzeko egokia delakoan nago, irakaskuntza eta eskolarako egina baitago. metodologia honek, gelan Interneten erabilera bultzatzen du, bertan bilatu beharko dutelarik ikasleek informazioa, baina irakasleak zuzenduta egingo dute. Beraz, kooperatiboa eta orientatzailea izango da. Honako atalak izan ohi ditu:

Blogaren egilearena

Honen helburua, ikasleak Interneten dabiltzanean galduta ez ibiltzea izango da; honela, irakasleak gidatzen dituenez, informazioaren erabilpen egokia egingo dute. Gainera, edozein gai lantzeko aukera ematen digute eta edozein mailatara egokitu daitezke, beraz, lehen esan bezala, eskolarako oso aproposa da.






Hemen daukazue Lehen Hezkuntzako laugarren mailako ikasleentzat egina dagoen Webquest bat, Natura irakasgaia lantzen duena: Uraren zikloa
Metodologia hau aztertzen ibili ondoren, alde positibo eta negatiboak dituela ohartu gara.

Blogaren egilearena

Honekin bukatuta, teknologia berriek gure gizartean ekarri dituzten aldaketez hitz egiten aritu gara eta eztabaida moduko bat sortu da. Irakasleak, bere ustez, hauek Haur Hezkuntzan erabiltzen hasi beharko liratekeela komentatu digu. Baina gutako gehienok ez gara horrekin ados agertu, haur txikiek ez dutela horrelakoen beharrik uste baitugu. Nire partetik, teknologia berriak haurrak idazten eta irakurtzen ikasten dutenetik aurrera soilik sartu beharko genituzke eskolan. Gainera, muga batekin eta egiten dutena kontrolatuz erabiltzea proposatuko nuke, haurrek adin horretan jolasekin jolastu eta lagunekin egotea beharrezkoagoa iruditzen baitzait pantaila aurrean egotea baino. Honez gain, era honetara txikitatik gailu horiekiko menpekotasuna izatea errazagoa izango litzatekeelakoan nago, ez baitaude horietan emango duten denbora neurtzeko adinean; beraz, ez litzateke batere onuragarria izango haientzat. Gerora ere denbora soberan izango dute horiekin ibiltzeko!!

Bigarren saio praktikoan, ordea, irakasleak Ardora lantzeko asmoa zeukan baina hainbat arazo izan ditugu unibertsitateko ordenagailuekin; beraz, ez dugu sartzea lortu. Hala ere, batez ere klase partikularrak edo ematen baditugu ikasleekin erabiltzeko oso ondo dago dagoela esan digu, ariketa asko agertzen baitira bertan. Etxeko ordenagailuan probatzeko eskatu digu baliagarria izango zaigula adieraziz.

Jarraian, Padlet mural bat egiteko aukera ematen duen programa erabiltzen hasi gara. Lehen Hezkuntzan erabiltzeko oso egokia iruditu zait, izenburuak eta argazkiak jartzea eta ordenatzea da eginbeharrekoa eta emaitza politak atera ditzakegu bertatik. Gainera, ez dauka inolako zailtasunik. Desabantaila bakarra online erara soilik gorde dezakegula izan daiteke, ez baitu murala den bezala argazki bezala deskargatzeko aukerarik ematen, hori egiterakoan atzealdea soilik agertzen da, beraz ez digu balio. 
Hona hemen guk programa honen bidez egindako murala: Natura. Lehen Hezkuntza.

Blogaren egilearena

Bukatu da gaurkoz astea! Datorren astera arte!