Azken txanpan!

Modulu astearen ondoren, bueltan gatoz berriro ere!

Bagoaz aurrera pixkanaka pixkanaka, laster klaseekin ere amaituko dugu eta!

Oraingoan ere, astero legez saio magistraleko aurkezpenekin eman diogu hasiera asteari.

Lehenengo aurkezpenean, Web 2.0 ri buruz hitz egin dute. Aurreko saioren baten ere aipatu dugun moduan, informazioa elkarbanatzeko, hartzeko, erabiltzeko eta erraztasunez nabigatzeko aukera ematen du.

Egia da oso erabilia dela, sarean sartzen garen eta edukiak elkarbanatzen ditugun guztiok protagonistak baikara, hau da, kontsumitzaile edo sortzaile izan gaitezke; dena den, alderdi negatiboak ere baditu, Interneta izatea derrigorrezkoa dela, adibidez.

Horrekin lotuta, esan beharra dago, hauek argitaratzeko aukera ezberdinak ditugula: kolaboratiboa, zeharkakoa (adibidez Youtuben gehien ikusitako bideoen zerrenda agertzen denean), instrumentala (Wikipedia kasurako) eta baita baliabide eta helburu bezala (sare sozialak adibidez). Ondorioz, oso baliagarria eta erabilgarria da.

Hori dela eta, adituak, Web 3.0 ra abiatzen ari dira gaur egun, eraginkorragoa izateko asmoz eta 3Dko ikuspegia emateko asmoz. Informazioaren kontrol segurtasun gehiago eskainiko digun arren, oraindik horra heltzeko bide luzea egiteko daukagula  uste dut.

Bigarren aurkezpena, aldiz, E learningari buruzkoa izan da. Irakaskuntza birtuala da, hau da, online hezkuntza, Interneten bidez emandako irakaskuntza prozesua. Irakasle ikasle arteko urruntasun fisikoa egon arren, komunikazioa etengabea da eta ikasleek edozein unetan erabili dezakete.

Honekin lotuta, bi adibide aipatuko ditugu. Moodle, unibertsitate edo goi mailako ikasketetan erabiltzen den sistema; eta bestetik, Educaplay, irakasleek ikasleentzako ariketak jaso edo prestatzen dituzten gunea, ikasleentzako oso erabilgarria dena klasean emandako edukiak ariketen bidez lantzeko.

Ondorioz, eskeman ikus dezakegunez, gaur egun hiru hezkuntza mota ezberdindu behar ditugu:

Bolgaren egilearena

Gure gizarteari erreparatuz gero, argi dago IKTak etorkizuneko irakaskuntza prozesuen oinarria izango direla; hala ere, ziur nago hauek ez dutela inondik inora irakasleen rola ordezkatu behar.

Egia da hainbat abantaila dituztela, hala nola, erosotasuna, autonomia, informazio ugaritasuna, edozein leku eta momentutan erabiltzeko aukera, lan kolaboratiboa bultzatzea, material didaktikoa erraztea, hezkuntza eskaintza egokitua ematea edo eguneratuta egoteko aukera ematen digutela. Hala ere, desabantailak ere baditu: oinarrizko ezagupen batzuk izan behar ditugula, Interneten beharra, sistema tradizionalaren erresistentzia, denbora gehiago eskatzen dutela, sozializazio eza...

Aurkezpenetan esandakoa kontuan izanez, IKTak eskolan sartzea aukera paregabea iruditzen zait. Dena den, zortzi urte baino gutxiagoko haurrek ez lituzketela hauek erabili behar uste dut, haien adinean paperean idazten ikastearekin nahikoa dutela, paperak aukera zabala eskaintzen baitie haurrei; bestela menpekotasuna ere areagotuko litzateke. Horrez gain, IKTen desabantailak kontuan izanda, ez nago hezkuntza ez presentzialaren alde, dena birtuala izatea ez baitut egoki ikusten. Azalpenak emateko irakasle bat egotea beharrezkoa, eta baita haurrekin zuzeneko erlazio bat izateko ere, hori ere oso garrantzitsua baita.

Aste honetako saio praktikoa oso dibertigarria iruditu zait. Hasteko, Hot potatoes programa erabiltzen hasi gara, eta honen bidez ariketak sortu ditugu. Hasieran, erabiltzeko zaila iruditu zitzaidan, ez  bainuen haren funtzionamendua ondo ulertzen; dena den, nola erabili ikasi dudanean, erraza dela frogatu ahal izan dut. Tresna egokia iruditzen zait irakasleek ikasleentzako ariketak prestatu ahal izateko. Ikasleek, ordea ariketa horiek burutuko dituzte, zailegia iruditzen baitzait haurrek ariketak sortzea programa honen bidez.

Adibide bat ikusteko, nik programa honen bidez sortutako ariketa begiratu dezakezue: Euskararen erabilera

Honekin bukatuta, Movie Maker erabiltzen hasi gara, oso interesgarria iruditu zaidana. Kartel bat hartu eta bideo moduan erreproduzitzea lortu behar genuen eta helburura iritsi gara! Hasteko, kartela zati txikietan ebaki dugu eta programa honetan argazki guztiak elkarren atzean jarri eta elkartu ditugu. Hori egin ostean, musika gehitu diogu (kartelaren edukiarekin bat zetorrena) eta argazkien aldaketa musikaren erritmoarekin lotu dugu ondo koordinatu daitezen. Azkenik, efektuak ere sartu dizkiogu politago gera dadin eta bukatzeko, bideo moduan gorde dugu.

Movie Maker erabiltzea oso interesgarria izan da, hainbat gauzatarako balio duelako eta emaitza oso onak atera ditzakegulako bertatik. Gainera, erabiltzeko oso erraza da eta irakasle batek hau kontrolatzea ezinbestekoa izango litzateke ikasleekin, haien argazkiekin, eduki berrien informazio edo argazkiekin edota marrazkiekin bideo bat muntatu nahi badu; askok era bisualean askoz hobeto barneratzen baitituzte edukiak. Esandakoaz gain, modulu lanaren muntaia egiteko ere balio izan digu eta emaitza ona lortu dugulakoan nago, hainbat gauza egiteko aukera ematen baitigu. Bideoan hainbat efektu sartu ahal izan ditugu lanari beste itxura bat eman diotenak.

Hona hemen nik egindako kartel baten bideoa.

Hori alde batera utzita, Podcasta zer den ere ikasi dugu. Artxibo digital bat da, aho korapiloak, ipuinak, asmakizunak, kantak… grabatzeko erabiltzen dena. Horien artean, Poderato aztertzen hasi gara eta nahiz eta oso baliagarria iruditu erabiltzeko ez dela oso erraza ohartu gara, irakasleak nola egin azaldu gabe geure kontura erabiltzen ikastea zaila iruditu baitzait. Hala ere, haurrek audioak grabatu eta irakasleak gidatzen badie egokia eta dibertigarria da eskolarako.

Horrekin bukatu dugu gaurko klasea! Ondorioz, datorren astera arte!! Ondo izan!

Etorkizunari begirada: Interesgarria irakasle izango garenontzat

Astero legez, saio magistralarekin hasi dugu IKT irakasgaia. Gaurko bi taldeek Interneti buruz hitz egin digute eta hainbat gauzei buruz ohartzeko aukera izan dut.

Hasteko, lehenengo taldeak Interneten arriskuez hitz egin du. Egia da honi esker informazio asko daukagula eskura eta komunikazioa eta bizitzako beste hainbat alderdi errazten dizkigula. Hala ere, hainbat arrisku ditu eta askotan ez gara horietaz ohartzen. Arrisku handiena gaztetxoen artean sumatzen dut.

Internetek hainbat kalte eragin ditzake gizartean (haur pornografia, arrazakeria, indarkeria...) eta gezurreko informazioa ere eman diezaguke gu ohartzen ez garen arren (kasurako ezezagun batekin hitz egiterakoan).

http://www.blogtrw.com/wp-content/uploads/redes-sociales1.jpg

Ohartu beharreko beste faktore bat da Internetek ez duela informazio pribatua babesten, denon eskura dago bertan jarritako informazioa eta enpresek bertako datu guztiak erabili ditzakete; adibidez, sare sozialetan jartzen dugun informazioa.

Gizartean faktore honek eragindako aldaketak direla eta, eskolek zeregin garrantzitsua daukate arlo honetan, ikaslearen ongizatea bermatu behar baitute eta arriskuak kontrolatzen jakin behar baitute. Beraz, ikasleei sarea arduraz erabiltzen irakasteko material didaktikoa sortu da. Safe proiektua. Material hau hizkuntza ezberdinetan dago eta arriskuak gutxitzeko eta monitorizatzeko programak erabiltzea du helburu. Gainera, IEP (Internet segurtasunez erabiltzeko Eskola Politika) prestatu dute eskolan arriskurik gabe sarean ibili ahal izateko.

Egia da, Internetez ematen den hezkuntza beharrezkoa dela, berau bizitza modernoaren funtsezko zatia baita guretzat. Gainera, maila igotzeko, arrakasta sustatzeko, informazioa kudeatzeko... aukera zabala eskaintzen digu tresna honek. Hala ere, irakasleek, nire ustez, hezkuntza mota honetan, ikasleak gidatu beharko lituzkete Interneteko sarbidea haiek erabiltzeko diseinatuta egon dadin eta adinaren araberako iragazteko sistema izan dezan arriskuetatik babesteko; horrez gain, erabilera ere arautu beharko lukete.

Bigarren aurkezpenak, Segurtasuna Interneten izenburua izan du. Hasteko, sareko edukiak ebaluatzen ikasteko estrategia batzuk azaldu dizkigute, askotan ez baitugu kontuan hartzen. Adibidez, Copyrighta errespetatzearena, beraz, informazio iturriak aipatzen irakastea ezinbestekoa da. Ikastetxeak ikasleek legedia kontuan hartzen dutela ziurtatzea ezinbestekoa da.

Aipatutakoaz gain, eskolan web orriak erabiltzen dituztenean informazio pertsonalik ez jartzeko eskatuko zaie haurrei; argazkirik ez jartzeko gurasoen baimenik ez baldin badute, edonork ikus ditzakeelako. Horrekin ciberbullyinga bezalako arazoak ekidingo dira.

Ondorioz, Lehen Hezkuntzan haurrekin Interneta erabiliz gero eta dena ondo kontrolatuta izateko, non sartu eta zer egin behar duten esatea beharrezko ikusten dut, guztion lana baita txikiak babestea. Horretarako, neurriak hartu behar dira eta heziketa nahiz prebentzioa izango dira garrantzitsuenak sarean segurtasunez ibili ahal izateko.

Saio praktikoetan, beste hainbat gauza berri ikasi ditugu. Saioaren hasieran, erretiroa hartuta daukaten emakume talde bat etorri da, berrogei urtez irakaskuntzan lanean ibilitakoak ziren. Pozgarria izan da haien poza eta lanarekiko erakutsi diguten pasioa ikustea, ikasketekin gogoz aurrera jarraitzeko indarra eta motibazioa eman baitidate!

Aste honetako saio praktikoak, irakasle izango garen aldetik, oso baliagarriak iruditu zaizkit, eskura ditugun hainbat baliabide erabili ahal izateko aukera eman baitigute. Hasteko, batez ere, hezkuntzara bideratutako softwareak aztertu ditugu, hezkuntzarako sortuta daudenak eta haurrek eginez ikasteko hainbat ariketa dibertigarri eskaintzen dizkigutenak.

http://apriencia.files.wordpress.com/2011/12/eskola-2-0.jpg

Horien artean, Jclic aztertu dugu lehenik. Egia da erabiltzeko Interneta beharrezkoa dela, baina hainbat irakasgai, adin eta gai ezberdinei buruzko ariketak daude, jolasen bidez ikasteko. Ziur nago, haurrak gusturago ikasiko dutela era honetan eta errazago egingo zaiela. 
Hona hemen bertako ariketa bat: zonaClic - actividades - Gure hortzeria
Ondoren, Educaplay ere aztertu dugu, helburu berarekin sortua da hau ere. Honetan harpidetu eta ariketak sortzeko aukera izan dugu. Irakasleentzat ariketak sortzeko erabilerraza da eta ikasleentzat, aldiz, motibagarria. Beraz, hezkuntzan onurak ekarriko dizkigu, oso gomendagarria da eskoletan erabiltzeko. Hona hemen nik sortutako ariketa: Adjektiboak

Eskola 2.0k eskaintzen dizkigun baliabideak ere aztertu ditugu, bertan, irakasleek esekitako aktibitate ezberdinak daude denon eskura eta baita Recursosparaprofesores izeneko orrian ere, biak oso interesgarriak haurrekin erabiltzeko! 

Horrez gain, Lehen Hezkuntzan, komikiak zein ipuinak asko erabiltzen direnez, Prixton programa aztertzen ibili gara eta komikiren bat ere sortu dugu. Hona hemen nire adibidea (irudian klik eginez gero, komiki guztia irakurri daiteke):

Egia esan, irakasleek erabiltzeko eta ikasleak dibertitzeko programa interesgarria delakoan nago; baina ez dut uste ikasleek erabiltzeko erraza denik, hainbat faktore hartu behar direlako kontuan: paisaia, pertsonaien keinuak, aurpegia, forma... dena aldatzeko aukera ematen du, beraz, ikasleentzat nahasgarria izan daiteke haiek askatasunez lan egiteko baldin bada. Hala ere, irakaslearen laguntzaz egiten baldin badute eta bikoteka antolatzen badira, Lehen Hezkuntzako hirugarren zikloan erabili ahalko litzateke.

Komikiei ahotsa jarri eta bideoak sortzeko programa bat ere badela ikasi dugu, Xtranormal izenekoa. Haurrekin lan egiteko oso interesgarria izan daiteke, sormena eta irudimena lantzeaz aparte, idatzizko adierazmena eta ortografia lantzeko aukera ere ematen digulako.

Jarraian, ondorengo kontzeptuak ikasi ditugu: PLE (Personal Learning Environment), hau da, norberak duen ingurunea teknologia berrien inguruan, norberaren ikaskuntza gunea; LMS (Learning Management System), ikasteko plataformak, hain zuzen ere, moodle, e gela eta halakoak; eta MOOC (Massive Online Open Course) modu masiboan online egiten diren ikastaroak. Kontzeptu hauek oso erabiliak dira teknologia berrien munduan, beraz menperatzea oso garrantzitsua da.

PLE eta lehen aipatutako bideo moduan egindako komikien adibideak ikusteko honako orri hau erabili dugu:

Honekin lotuta, ikasleen behe mailako gaitasunaz hitz egiten aritu gara, hau da, ikastea, ulertzea eta aplikatzea, normalean guztiok menperatzen duguna; hala ere, goi mailako gaitasunak lortzea ezinbesteko ikusten dut, analizatzea, sortzea eta ebaluatzea, hain zuzen ere.

Aste honetako materia asko gustatu zait, izan ere, irakasle bezala erabili ahal izango ditugun hainbat baliabide eman dizkigu eta oso interesgarriak iruditu zaizkit guztiak. Aste produktiboa izan da oraingoa!!